• Сошиал хаягууд

Танилцуулга

  1. Нүүр
  2. Бидний тухай
  3. Танилцуулга

Бид юу хийдэг вэ?

Хувь хүн нийтийн эрх ашгаас дээгүүр өөрийн хүслээ тавьдаг, амьдралаас зөвхөн таашаал авахыг туйлын зорилгоо болгодог хэт аминч үзлийн нөлөөнд өнөөгийн хүүхэд залуус маань өсөн бойжиж байна. Бусдын эрхийг хүндэлдэг, доройг энэрдэг ёс суртахууны үнэт зүйлд тулгуурласан сайн зан чанарыг хүүхдэд төлөвшүүлэхгүйгээр хүнлэг, шударга ирээдүйн иргэд өөрөө аяндаа бий болохгүй. Тиймээс эцэг эх багш нар хүүхдэд багаас нь зөв хандлага, харилцааны ба эрүүл амьдралын дадлыг хэр сайн эзэмшүүлнэ, төдий чинээ амжилттай баталгаатай нийгмийг тэд бүтээх нь гарцаагүй. Энэ зорилгод хөтлөгдөн бид 2013 оноос хойш хүүхдэд зан чанар харилцааны дадал эзэмшүүлэх “Сайн Хүүхэд” хөтөлбөрийг санаачлан, амжилттай хэрэгжүүлж ирлээ. Өдгөө Ерөнхий Боловсролын арван найман сургуулийн 7000 орчим сурагчид, 400 гаруй багш, 1200 ээж, 1000 гаруй аав нарыг хөтөлбөртөө хамруулан ажиллажээ.

Хөтөлбөрт хамрагдсан сурагчид Сайн Үйлс аяны хүрээнд сурч эзэмшсэн сайн зүйлсээ амьдралдаа хэрэгжүүлдэг.  Тэд бусдын тусламж зайлшгүй хэрэгтэй асрах газрын багачууд, өндөр настанд бодит тусламж үзүүлэх, мөн өөрсдийнх нь төлөө хариуцлага хүлээн өдөр бүр хичээнгүйлэн ажилладаг багш, сургуулийн удирдлага, цэвэрлэгч, манаач гээд олон хүнд талархлын захиа бичиж, урмын үгээр дэм өгч байдаг. Мөн орон нутгийн удирдлага, хүн ардынхаа эрүүл энх, амар амгалан байдлын төлөө чин сэтгэлээсээ ажилладаг эмч сувилагчид ба цагдаагийн албан хаагчдад чин сэтгэлийн үгтэй мэндчилгээг өөрсдөө урлаж ажлын байранд нь авчран өгч, сэтгэлийн урам хайрладаг.   Хөтөлбөрийг дүүргэсэн хүүхдүүд сайн үйлсийн олон аянд хамрагдаж, сайхан үйлс бүтээж, түүнийхээ  утга учир, баяр хөөрийг мэдрэхийг чин сэтгэлээсээ хүсэж мөрөөддөг болсон нь бидний нөр их хөдөлмөрийн бахархал болдог билээ.

Эрхэм зорилго

Иргэншсэн ирээдүйн монголыг бүтээхийн төлөө бид хойч үеэ сайнд хөтөлж, хамтын ажиллагааг эрхэмлэнэ.


Бидний алсын хараа

Ирээдүйн Монголын иргэд болсон хүүхдүүдэд зан чанар, хандлага, харилцааны сайн дадлыг эзэмшүүлж, эцэг эх, багшийн хөгжлийг дэмжин ажиллана.

ҮҮСГЭН БАйГУУЛАГЧ Ц.БАДАМХАТАНГИЙН ҮГ

Таны эзэмшсэн боловсрол, эрхэлдэг ажил ямар байхаас үл шалтгаалж, гэр бүл, найз нөхөд, хамт олныхоо итгэл ба хүндлэлийг олж авахад хүргэдэг зүйл бол таны хувийн зан чанар юм. Бусдын итгэл хүндлэлийг олсон хүн удаан хугацаанд амжилттай карьер, аз жаргалтай амьдралыг бүтээж чадна. Тиймээс бид хүүхдэд багаас нь сайн зан чанарын үндсийг суулган, тордож ургуулвал тэд амьдралд тохиох алив саад бэрхшээлийг даван туулах зөв хандлага ба сэтгэлийн хаттай байхаас гадна бусадтай эерэг, бат бөх харилцааг бий болгож чадах хэмжээний төлөвшилттэй хүн болно.

Манай хамт олон улс орныхоо хөгжлийн түлхүүр болсон иргэдийнхээ хувь зан чанар, ёс суртахуун, харилцааны соёл, чадварыг хөгжүүлэх төрийн бодлогыг дэмжиж, дэлхий нийттэй хөл нийлүүлэн алхахад Монгол хүний мөн чанар, харилцааны өсөлтөд нэн чухал зан төлөв, хандлага, харилцааны дадлыг хүүхэд залууст эзэмшүүлэн сургах хөтөлбөрийг боловсруулан хэрэгжүүлж, мэргэшсэн сургагч багш нарыг бэлтгэн ажиллаж байна. “Сайн Иргэн – Сайн Ирээдүй ТББ” нь зан чанараас үүдэлтэй харилцааны аливаа асуудлыг эерэгээр шийдэх олон үнэт санааг ирээдүйн эзэд болсон хүүхдүүдэд, тэдний эцэг эхэд хүргэхийн зэрэгцээ, хүүхдэд сайн зан чанарыг өвлүүлж, зүрх сэтгэлд нь шигтгэж өгөхийн төлөө бүх талаар хичээн ажиллаж байна. Хөтөлбөрт хамрагдсан эцэг эхчүүд хүүхдийнхээ ертөнцийг ойлгодог болж, илүү дотно харилцаатай болсноо, харин хүүхдүүд гэрэл гэгээтэй, утга учиртай зорилгыг бяцхан зүрхэндээ тээдэг болсноо, бусдыг хайрлаж, уучилж, хүндэтгэдэг болсноо илэн далангүй хуваалцаж байгаа нь эргээд сургагч багш нартаа маш их урмыг өгдөг. Хүүхэд бүр адилгүй онцлогтой, чадвартай, өгөгдөлтэй. Түүнийг багш хүн олж харж, үнэлж өнгөлж, тодоор гэрэлтүүлэх нь эгнэшгүй гэгээн үйлс юм. Мөн энэ эрхэм зорилгын төлөө бид аливаа боловсрол, бизнесийн байгууллага, түүнчлэн эцэг эх болон сургуулиудтай ямагт хамтран ажиллах болно.

Түүхэн замнал

  1. 2009-2012
  2. 2013-2014
  3. 2014-2015
  4. 2015-2016
  5. 2016-2017
  6. 2017-2018
  7. 2018-2019
  8. 2019-2020
  9. 2020-2021

  1. Сургууль завсардсан хүүхдүүдэд дүйцүүлэх боловсрол олгох “Албан бус боловсрол” төслийг санаачлан хот хөдөөгийн 4400 хүүхдэд сургалт явуулсан.

  2. Налайх дүүргийн Голомт цогцолбор сургуулийн 4–р  ангийн нэг бүлэгт анх Сайн Хүүхэд хөтөлбөр хэрэгжиж эхэлсэн. Хичээлийн жилийн турш сургалт амжилттай явагдаж хүүхдүүдийн зан чанар харилцаанд олон эерэг үр дүн гарсанаар сургуулийн захиргаа дараа жил дахин хамтарч ажиллах хүсэлт тавьсан.

  3. 2014–2015 оны хичээлийн жилд Налайх дүүргийн Голомт цогцолбор сургуулийн 5–р ангийн 6 бүлгийн 187 сурагч, Дархан Уул аймгийн 1–р сургуулийн 6а анги, 4–р сургуулийн 7б, Энэрэл цогцолбор сургуулийн 7а ангийн 78 сурагч, нийслэлийн БЗД–н 84–р сургуулийн 5–р ангийн 54 сурагч хөтөлбөрт амжилттай хамрагдсан.

  4. 2015–2016 оны хичээлийн жилд Налайх дүүргийн боловсролын газрын хамтран ажиллах хүсэлтийн дагуу НД–н ерөнхий боловсролын 6 сургуулийн 5–р ангийн 27 бүлэг, БГД–н 40 сургуулийн 5–р  ангийн 2 бүлэг, ЧД–ийн 72–р сургуулийн 5 бүлэг нийт 1021 хүүхдэд Сайн Хүүхэд хөтөлбөр амжилттай хэрэгжсэн. Хичээлээс гадуур олон үйл ажиллагаа зохион байгуулсан ба энэ хичээлийн жилээс анги бүрийн эцэг эхийн төлөөлөл болсон хүмүүст гэр бүлийн харилцаа, хүүхэд хүмүүжлийн талаар сургалт зөвлөгөө өгч сургууль, эцэг эх, нийгмийн ажилтан, ангийн багштай хамтран ажилласан. Налайх дүүрэгт Сайн Хүүхэд хөтөлбөрийн клуб ажиллаж эхэлсэн ба хичээлээс гадуур хүүхэд, анги удирдсан багш, гэр бүл, олон нийтэд хандсан олон үйл ажиллагааг амжилттай зохион байгуулсан.

  5. 2016–2017 оны хичээлийн жилд НД–н боловсролын газартай хамтран 4 сургуулийн 6–р ангийн 18 бүлгийн 563 сурагч, БЗД–н 97–р сургуулийн 6 ангийн 5 бүлгийн 194, 33–р сургуулийн 6 ангийн 7 бүлгийн 307,  48–р сургуулийн 6–р ангийн 6 бүлгийн 239, 5–р ангийн 7 бүлгийн 253, СБД–н ТСБСДС–ийн 6–9 ангийн 269, 102–р сургуулийн 6–р ангийн 5 бүлгийн 159, ЧД–н 72–р сургуулийн 6 ангийн 5 бүлгийн 174 сурагч нийт 4 дүүргийн 10 сургуулийн 62 бүлгийн 2132 сурагч Сайн Хүүхэд хөтөлбөрт амжилттай хамрагдсан. Сургууль бүр дээр гэр бүлийн өдөрлөг арга хэмжээ, хичээлээс гадуурх олон үйл ажиллагаа, аянг амжилттай зохион байгуулсан.

  6. 2017–2018 оны хичээлийн жилд НД–н 4 сургуулийн 20 бүлгийн 505, БЗД–н 97–р сургуулийн 7–р ангийн 5 бүлгийн 193, БГД–н 47–р сургуулийн 6–р ангийн 4 бүлгийн 127, ЧД–н 72–р сургуулийн 7–р ангийн 4 бүлгийн 157, СБД–н ТСБТСДС–ийн 10 бүлгийн 242, ХУД–н 52–р сургуулийн 8–р ангийн нэг бүлгийн 46 хүүхэд нийт 6 дүүргийн 10 сургуулийн 44 бүлгийн 1281 сурагч Сайн Хүүхэд хөтөлбөрт хамрагдлаа. Мөн хичээлийн жилд багш, эцэг эхчүүдэд зориулсан сургалтуудыг хамтран ажиллаж байгаа сургууль бүр дээр зохион байгуулсан ба нийт 387 багш, 238 аав, 329 ээж хамрагдсан.

  7. 2018–2019 оны хичээлийн жилд БСШУСЯ–тай хамтран ЧД–н 23р сургуулийн 2 бүлгийн 114, БЗД–н Тэмүүжин өрлөг сургуулийн 2 бүлгийн 50 сурагч мөн НД–н 4 сургуулийн 20 бүлгийн 552, БГД–н 47 сургуулийн 4 бүлгийн 180, СБД–н Логорифм сургуулийн 5 бүлгийн 137, ХУД–н 52–р сургуулийн 3 бүлгийн 122, Сакура сургуулийн 1 ангийн 18, НЗД–н дэргэдэх ХЗСХЦТ 2 бүлгийн 24 нийт 6 дүүргийн 10 сургуулийн 37 бүлгийн 1197 хүүхэд Сайн Хүүхэд хөтөлбөрт хамрагдсан.

  8. 2019–2020 оны хичээлийн жилд НД–н 5 сургуулийн 22 бүлгийн 621, СБД–н Логорифм сургуулийн 5 бүлгийн 128, ХУД–н Сакура сургуулийн 5 бүлгийн 113 сурагч нийт 3 дүүргийн 7 сургуулийн 32 бүлгийн 862 сурагч Сайн Хүүхэд хөтөлбөрт амжилттай хамрагдаж төгссөн. Бид хүүхдүүдээс гадна эцэг эхчүүдэд зориулсан сургалтуудыг зохион байгуулдаг ба энэ жилийн сургалтанд 421 ээж 196 аав хамрагдсан байна.

  9. 2020–2021 оны хичээлийн жилд НД–н 5 сургуулийн 5–р ангийн 26 бүлгийн 825 хүүхэд Сайн Хүүхэд хөтөлбөр хамрагдаж байна.